PAGKAMULAT

I can still remember that very first moment na nagkakilala tayo aking mahal na Wayzi. Hindi ko noon maipaliwanag ang aking nararamdaman. Marahil pinaghalong kaba, pananabik at pagka-blanko ang sa aki’y nananahan. Kaba, sapagkat matagal na ring ako’y hindi nagkamayroon ng ganitong karanasan. Mula sa ilang buwan o taon na yatang maituturing na ako’y naging isang hindi maituturing na normal na estudyanteng nakikipagsabayan sa mabilis na agos ng pakikipagsapalaran—pinagsasabay ang pagtuklas sa bawat sulok ng kaalaman at ang pagkita ng salaping pambuno sa pang-araw-araw kong pakikipagsapalaran sa apat na sulok ng institusyong aking kinabibilangan.

Gayunpaman, marahil tayo’y sadyang pinagtakda ng pagkakataon. Marahil naguhit na sa aking palad na ika’y maging bahagi ng aking abang buhay. Sino ba naman ang mag-aakalang mula sa mabilis na pahinang aking tinatakbuhan ay iyo akong imumulat sa isang buhay na kailanma’y hindi pumasok sa aking diwa—ni hindi ko pinangarap. Kaya nga kahit ako’y balot ng kaba at pagkayamot sa aking mga kaibigang nangakong sabay ka naming tutuklasin—kagaya nga ng pagtuklas namin isang linggo pa lang ang nakakaraan sa mundo ng tinatawag na mga Peer Counselors—buong tatag akong nanindigan na tatapusin ang tatlong araw nating ganap na pagkilala sa isa’t isa.

Pananabik, sapagkat ito’y bagong karanasan. Isang pagbabago sa hindi ko man amini’y nakakabagot na ritmo ng aking pang-araw-araw na buhay. At pagka-blanko pagka’t literal na wala akong baon ni katiting na kaalaman sa kung anong karanasan itong aking tatahakin.

Kaya nga sa loob ng tatlong araw na iyon, kasabay ng pagkakilala ko sa aking sarili at kasabay din ng pagmarka sa aking buhay ng mga pangalang Mommy Venus, Earl, Jinggay, Ranie, Lorlyn, Albert, Lhan, Ramil, Louel, Erwin, at Redentor; kasabay ng mga munting galos na aking tinamo sa aming pagsasama at ng mga kaalamang ibinahagi nina Ginang Lasala, niyakap kitang pansamantala. Pansamantala lamang. Sapagkat sa aking pagbalik sa mabilis na daloy ng buhay na aking kinabibilangan, nalaman kong kailangan kong magparaya. Kailangan kong pumili sa pagitan ninyong dalawa.

Mabuti na lang at ikaw ang aking pinili...